Мöд югыдас нунысö на водз
Вина сорöн бура сёйöм бöрын
Аддзылi ме шензьöдана вöт:
Быттьö кöнкö шондiа зэв вöрын
Радейтчам ми нывкöд сьöлöмпöт.
Тöдсаöсь ми вöлiм нэм джын сайын,
Сöмын сэки медбурыс эз ло,
Радейтчöмным вочасöн бöр ваймис...
И со колис уна-уна во!
Тавой быттьö йитчим сыкöд помöдз,
Быттьö эз мун миян весьтöд кад,
Эз нин падмöд яндзим ни лёк вомидз,–
Дзоридзалiс сöмын Райса сад!..
Сэсся-й сэтчö воис кувсьöм ёртöй,
Матö сувтiс миян весьтö шог:
Гашкö, нуöдны нин менö мöдар Гортö
Сылöн вöлi кодъяссянькö мог?
Ми жö ог и тöдöй, мый и керны,
Матö воöм гыпкö миян вир,
Сэк жö некыдз кусöдны ог вермöй
Радейтчана ыпъялöмлысь дзирд...
Сэки ёртöй ылыстчис бöр чöла,
Воштiс сiйöс ас пытшкас том вöр,
Кысянь волiс – анделöн-ö вöлiн? –
Сэтчö мунiс сiйö шытöг бöр;
Гашкö, сiйö, кувсьылöм нин ёртöй,–
Кутшöм могъясöн кöть ме дiнö эз во –
Öнi чайтiс: тайö винёв мортсö
Мöд югыдас нунысö на водз.
Ытва
(сьылан)
Видзьяс вылö ойдiс Ытва,
Келiс ваö югыд дав,
Тэа-меа кыкöн кывтам,–
Гöгöр шылькнитчöма ва.
Ок, Ытва!
Ок, туис!
Ок, ловзьöдан ва!
Ок, Ытва!
Ок, тулыс!
Ок, радейтчан кад!
Сьöлöмъясын миян Ытва,
Ловзис Енмöн сетöм би,
Кыдзкö югыд ваыс вывтын
Кыськö аддзысим тай ми!
Ок, Ытва!
Ок, туис!
Ок, ловзьöдан ва!
Ок, Ытва!
Ок, тулыс!
Ок, радейтчан кад!
Мед оз ямлы миян Ытва,
Мед оз лолы сiйö руд,
Кыкöн водзö помöдз кывтам,
Аддзим кö нин югыд шуд!
Ок, Ытва!
Ок, туис!
Ок, ловзьöдан ва!
Ок, Ытва!
Ок, тулыс!
Ок, радейтчан кад!
* * *
Век быттьö налькйö шедöма кодь олан,
Век мыйкö понда вийсьö тэнад лов.
И чегсьысь олöм сёйö, быттьö сов,
И мыйкö лоöмысь век быттьö полан.
И тадзсö вийсиг мортыс лёкысь ярмö,
И чöжсьö сылöн ловсö личкысь мудз,
Да олан туйсö оз и помöдз вудж,
И кадысь водзджык Енлöн дзоридз нярмö.
Чужöмсянь нин киын зыр да чер
Чужöмсянь нин чайтсьö меным,
Кута киын зыр да чер,
Быттьö доддялöма пемöс –
Он и мынлы, мый кöть кер;
Вермас лоны, сiдз и пезьда –
Татшöм вичмас олан пай...
Сэки, гашкö, Енмыс мездас –
Видзтас меным кокни Рай?
Ас пытшсьыд корсьны бурмöдана сöдз
Оз артмы уна йöзкöд сибыд олöм...
Сiдз быттьö абу нин ме шыблас морт,
Век зiля вöчны бурджыка кыдз колö,
Но некыдз матыс йитöдъяс ог дор.
Век дойдö менö йöзлöн наянлуныс
Да яндзим тöдтöм окталана лэч –
Би öзтысь öгыр кусö зэвтчöм лунö,
И коля öтнам ярмöма и пöсь.
И асьтö вежны некыдзи он вермы –
Тэ мöд кодь ногöн вир ни сöн он вöч,
И бара ковмö асьтö кыдзкö бертны –
Ас пытшсьыд корсьны бурмöдана сöдз.
Век ме кодъясöскö видзи
Менам ставыс артмис сiдзи,
Вичмис меным сэтшöм пуд:
Век ме кодъясöскö видзи,
Тшöтш жö перйи налы «шуд».
Том арлыдöн война мырддис
Айлысь-мамлысь сöстöм лов,–
Сьöкыд олöмас на пыдди
Ковмис быдтыны чой-вок.
Сэсся-й аслам челядь чужис –
Содiс быдтысяна мог,
Та дырйи тай быдöн вуджö
Радлуныскöд унджык шог.
Сэсся лоины нин внукъяс,
Тшöтш и менам содiс тöжд,
Бара кыккирудз он пуксьы,
Он на люньöд ассьыд бöж.
Олöмыс тай век оз бурмы –
Öтарö век паныд чой,
Сэнi мыйкö век оз тырмы,
Кöть и тiльсян лун и вой.
Быдöнлы век колö отсöг,
Ас мортыдлöн мыджöд ки,–
Бара веськöд висьысь костö,
Кытчöдз синсьыд оз пет би.
Олöм вийсьöмысь оз дугöд,
Кöть тэ мый дыра эн ов,
Сiдзкö-й сöмын мöдар югыд
Лöняс босьтас менсьым лов.